ဤဆောင်းပါးကို ရေးသားရခြင်းမှာ မိမိ၏ ဖေ့စ်ဘုတ်စာမျက်နှာတွင် တက္ကသိုလ်ဝင်တန်းစာမေးပွဲ
လက်ထောက်ကြီးကြပ်ရေးမှူး တာဝန်ကျနေသဖြင့် အလုပ်များနေကြောင်းနှင့် အတွေ့အကြုံများကို
စေတနာဖြင့် အပြုသဘောတင်ပြမည်ဖြစ်ကြောင်း ရေးသားခဲ့မိရာ မိမိ မိတ်ဆွေအများက chat မှလည်းကောင်း
comment မှတသွယ် စောင့်မျှော်နေမည်ဖြစ်ကြောင်း ပြန်ကြားခဲ့သဖြင့်လည်းကောင်း ၊ မြန်မာ့ပညာရေးကို
ပိုမိုကောင်းမွန်လာပြီး ကျောင်းသားကျောင်းသူ လူငယ်များကို ငယ်စဉ်ကပင် စနစ်တကျ
ပြုစုပျိုးထောင်ခံရသည့် အနာဂတ်အတွက် အားကိုးရလောက်သည့် ခေါင်းဆောင်ကောင်းများ
ဖြစ်ပေါ်လာစေလိုသော စေတနာဖြင့်လည်းကောင်း၊ မည်ကဲ့သို့ မိဘများထိန်းကျောင်း ကြီးကြပ်ဖေးမ
ပေးရမည့် အခြေအနေမှန်များကို သိရှိနားလည်ပြီး ဆောင်ရွက်ကြစေလိုသဖြင့်လည်းကောင်း ၊ မှန်ကန်သည့်ခံယူချက်ရှိသည်ညီငယ်ညီမငယ်ပညာရေးဝန်ထမ်းများအနေဖြင့်လည်း ဆောင်ရန်ရှောင်ရန်နှင့်
အခြေအနေမှန်များကို သိရှိနားလည်ပြီး ဆရာကောင်း ပီသစေရေးအတွက်လည်းကောင်း
ရေးသားရခြင်းဖြစ်ပါကြောင်း အစီရင်ခံလိုပါသည်။
မိမိသည် နယ်စပ်ဒေသတွင် နှစ်ပေါင်းနှစ်ဆယ်ကျော် ပညာရေးဝန်ထမ်းအဖြစ် ဆက်တိုက်နေထိုင်ခဲ့ရသူ
ဖြစ်သဖြင့် ယခုတင်ပြချက်များသည် ပညာရေးကို လွန်စွာအားပေးသော မြို့ကြီးများ၏ အခြေအနေနှင့်
ကွာဟချက် ရှိနေပါမူ ခွင့်လွှတ်နားလည်ပေးပါရန် တင်ပြလိုပါသည်။
ဆောင်းပါးရှင်သည် မြို့နှင့် ခြောက်မိုင်ကျော်ဝေးသော ထိုင်းနယ်စပ်နှင့် တစ်မိုင်ပင်မဝေးသောနေရာမှ
မူလတန်းလွန်ကျောင်းအုပ်ဆရာကြီးဖြစ်ပြီး လက်ရှိကျောင်းတွင် လုပ်သက် ၁၃ နှစ်ရှိခဲ့ပြီဖြစ်ကြောင်း ကနဦး
တင်ပြလိုပါသည်။ပညာအရည်အချင်းမှာ B.Sc (Chem) , B.Ed ဖြစ်ပါသည်။ မိမိကျောင်းဝန်းကျင်
ကျောင်းများအား အုပ်စုမှူးအဖြစ် ကြီးကြပ်ကူညီပေးနေရသူတစ်ဦးဖြစ်ကြောင်းကိုလည်း တင်ပြ
လိုပါသည်။
စာမေးပွဲ ပထမနေ့ (၁၂.၃.၂၀၁၄) တွင် စာရေးသူသည် လက်ထောက်ကြီးကြပ်ရေးမှူးတာဝန်ဖြင့်
စာဖြေခန်း တစ်ခန်းတွင် အတန်းတွင်းတာဝန်ယူဆောင်ရွက်ရပါသည်။ အလယ်တန်းပြဆရာမတစ်ဦးနှင့်
တွဲဖက်တာဝန်ယူရခြင်းဖြစ်ပါသည်။ ၄င်းအတန်းတွင် ကံအားလျော်စွာ ကျွန်တော်၏ မူလွန်ကျောင်းတွင်
အမြင့်ဆုံးအတန်းဖြစ်သော သတ္တမတန်းအောင်သွားသည့် တပည့် ကျောင်းသားတစ်ဦးနှင့်ကျောင်းသူတစ်ဦး
ပါဝင်နေသည်ကို တွေ့ရပါသည်။ နှစ်ဦးစလုံးက တွေ့မြင်သည်နှင့် လေးလေးစားစား နှုတ်ဆက်ကြပါသည်။ သို့သော်စာမေးပွဲစည်းကမ်းများအရ အပြုံးတစ်ဝက်ပေး၍ မိမိလုပ်ငန်းများကို ဆက်လက်ဆောင်ရွက်ပါသည်။မြန်မာစာ ဘာသာရပ်ဆိုသော်လည်း နာရီဝက်ပင်မပြည့်သေးပါ။ တပည့် ကျောင်းသားလေးမှာစားပွဲပေါ်မှောက်လျက်အိပ်နေပြီဖြစ်ပါသည်။ တပည့်မ ကျောင်းသူကလေးမှာ ကြိုးစားဖြေနိုင်နေကြောင်းမြင်တွေ့ရပါသည်။
စာမေးပွဲဖြေဆိုပြီး၍ လက်ထောက်ကြီးကြပ်ရေးမှူးများ၏ တစ်နေ့တာ ကိစ္စတာဝန်များကို ကြီးကြပ်ရေးမှူးမှ
မှာကြားပြီး ပြန်ခွင့်ပြုသည့်ညနေ(၃)နာရီအကျော်တွင်ကလေး(၂)ဦးနှင့်သက်ဆိုင်ရာများကို လေ့လာမေးမြန်း
ခဲ့ရာ မိမိထင်မြင်သည့်အတိုင်း ကျောင်းသားတပည့်မှာ မဖြေဆိုနိုင်ကြောင်းနှင့် ကျောင်းသူတပည့်မှာ
ကောင်းစွာဖြေဆိုနိုင်ခဲ့ကြောင်း သိရှိရပါသည်။
မြန်မာစာကိုပင်ကောင်းစွာမရဘူးလားဟူ၍ စာဖတ်သူများဘက်မှ ထင်မြင်နေသူရှိပါလိမ့်မည်။ အမှန်တကယ်မြန်မာစာမရသူများ အမှန် ရှိနေပါသည်။ ၄င်းကျောင်းသားသည် ကျွန်တော်၏ကျောင်းကို အုပ်စုတွင်းအခြားကျောင်းမှလေးတန်းအောင်၍ ငါးတန်းလာတက်ခဲ့သော ကျောင်းသားဖြစ်ပါသည်။ မိမိအုပ်စုတွင်းမှ ကျောင်းအုပ်များကို လေးတန်းကို အရည်အချင်းမမီပါက ငါးတန်းအတွက် အခက်အခဲဖြစ်မည်ဖြစ်ကြောင်း အမြဲမှာကြားသော်လည်း ဆရာအမြဲ မတည်မြဲသော၊အတန်းငါးတန်းကို ဆရာနှစ်ယောက်၊တစ်ခါတစ်ရံတစ်ယောက်သင်ကြားရသော ကျောင်းမှ ကလေးများသည် မူလတန်း အရည်အချင်း မပြည့်မီဘဲ ကျွန်တော်၏ကျောင်းသို့ရောက်လာမြဲဖြစ်ပါသည်။
ပဉ္စမတန်းအတန်းပိုင်များကိုလည်း လာသည့်ကျောင်းအလိုက်စနစ်တကျမှတ်တမ်းထားပြီး ကလေးများ၏အခြေအနေကိုကျွန်တော်ကျောင်းအုပ်ကြီးမှ မေးမြန်းစစ်ဆေးလေ့ရှိပါသည်။ ထို့ကြောင့် ပဉ္စမတန်းဆရာမမှ ဆရာကြီး အဲ့ဒီကလေးအခြေခံတွေ ဘာမှပါမလာဘူး ။ စာလုံးပေါင်းပြီးဆိုတာတောင် အသံမမှန်ဘူး။ ဒုက္ခဘဲ ဆိုသည်ကိုကြားခဲ့ရပါသည်။ မိမိကျောင်းသည်လည်း ဆရာအင်အားအသင့်အတင့်ရှိသော်လည်း ၀န်ထမ်းအင်အားလုံလောက်သော
ကျောင်းမဟုတ်ပါ။ လုပ်အားပေးဆရာမ (၂) ဦးကို ငှားထားရပါသေးသည်။ ပဉ္စမတန်းကျောင်းသား
အရေအတွက်မှာလည်း ငါးဆယ်ကျော်ရှိပါသည်။ အတန်းပိုင်ဆရာမအား ဆရာမအနေဖြင့်
အားလပ်ချိန်များတွင် မေတ္တာဖြင့်မြန်မာစာအခြေခံများကို ကူညီသင်ပေးရန် စည်းရုံး၍မှာကြားခဲ့ပါသည်။
မည်သို့ပင်ဖြစ်စေကာမူ ကျောင်း အတန်းပိုင်ဆရာတို့၏ နှစ်စဉ် မှတ်တမ်းမှတ်ရာ စစ်ဆေးခြင်းအမျိုးမျိုးနှင့်
စာမေးပွဲများအရ ၄င်းကလေးမှာအတန်းအဆင့်ဆင့်ကိုကျော်လွန်၍ တက္ကသိုလ်ဝင်တန်းကို ရောက်ရှိခဲ့ပြီ ဖြစ်ပါသည်။
မိဘနှင့်ဆရာပူးပေါင်း၍ ကလေး အခြေခံများခိုင်မာရန် ကျွန်တော်သည် အထပ်ထပ် အတန်းစဉ် သတ္တမတန်းအထိအမြဲ မှာကြားမြဲ ဖြစ်ပါသည်။ သို့သော်လည်း ကျောင်းအုပ်ကြီး မည်မျှမှာကြားသော်လည်း အခြေခံမခိုင်ဘဲ တက္ကသိုလ်ဝင်တန်းအထိပင် ယခုကျောင်းသား ရောက်ရှိခဲ့ပါပြီ။ မဖြေနိုင်ပါက အဆိုပါကျောင်းသားသည် အဆင့်မြင့်တက္ကသိုလ်ပညာ မရရှိဖို့အခြေအနေက ရာခိုင်နှုန်း များနေပြီဖြစ်ပါသည်။
ဆရာနှင့်နေ့စဉ်အများဆုံး မြန်မာစကားပြောဆိုသုံးနှုန်း ရေးသားနေသော မြန်မာနိုင်ငံသားကလေးငယ်များသည်
မြန်မာစာကိုပင် ခက်ခဲနေမည်ဆိုလျှင် အခြားအင်္ဂလိပ်ဘာသာဖြင့် လေ့လာသောဘာသာရပ်များသည် ပို၍ပင်ခက်ခဲပါလိမ့်မည်။မိဘများအနေဖြင့်မိမိကလေးအခြေအနေမှန်များကို သေချာလေ့လာသင့်သောအခြေအနေဖြစ်ပါသည်။ ဆရာများသည်လည်း အတန်းစဉ် အလိုက်အဆင့်ဆင့် မကုစားခဲ့သောကြောင့် ယခုကဲ့သို့ ရလဒ်ဆိုးဖြစ်နေရခြင်းဖြစ်ပါသည်။ မူလတန်းတွင်တာဝန်ယူသောဆရာများ၌ အထူးတာဝန်ရှိပါသည်။
စာမေးပွဲ ကောင်းစွာဖြေဆိုနိုင်သော ကျောင်းသူမှာ ကျွန်တော်၏ မူလွန်ကျောင်းတွင် သူငယ်တန်းမှစတင်၍ တက်ခဲ့သောကလေးဖြစ်ပါသည်။ ကျွန်တော်၏ကျောင်းတွင်လည်း အကောင်းဆုံးဟု မပြောလိုပါ။ ကျောင်းအုပ်ကြီးအနေဖြင့် နှစ်နှစ်မပြည့်မီပင်ပြောင်းနေကြသော လက်ထောက်ဆရာဆရာမများကို အနီးကပ်ကြီးကြပ်နေရခြင်း ရှိပါသည်။
အလယ်တန်းဆင့်သို့ရောက်သောအခါ များလာသည့်သင်ရိုးများကို ပြည့်မီအောင် သင်ကြားနေရသည့်
အလယ်တန်းပြဆရာများက အခြေခံကိုပြန်သင်ရန် ခက်ခဲသည်ကိုလည်း နားလည်စာနာမိပါသည်။ အလားတူ အထက်တန်းတွင် သင်ကြားနေရသောဆရာများသည်လည်း ခက်ခဲလိမ့်မည်ဖြစ်ပါသည်။
အထက်တွင် တင်ပြခဲ့သော အခြေအနေများကို သိရှိခြင်းဖြင့် မိမိ၏သားသမီးအခြေအနေများကို အမြဲတစေ ဂရုတစိုက်မပြုနိုင်သေးသော မိဘများအနေဖြင့် ကလေးများ မြန်မာစာအခြေခံမှစ၍ ကလေးနှင့်နီးစပ်ပတ်သက်နေသော ဆရာဆရာမများ၏ အခြေအနေများကို နားလည်သဘောပေါက်ပြီး မိမိကလေးများ ပညာတတ်ကြီးများဖြစ်ပေါ်လာစေရန်စဉ်ဆက်မပြတ် လေ့လာပံ့ပိုးပေးရန်လိုပါသည်။ လိုအပ်သည်များကို ဖြည့်ဆည်းဆောင်ရွက်သွားခြင်းဖြင့် မိဘများ မျှော်မှန်းသလို ကလေးများ၏အနာဂတ်ဘ၀တိုးတက်မှု ဖြစ်ပေါ်လာစေရန် ရည်ရွယ်လျက် ၂၀၁၄ တက္ကသိုလ်ဝင်တန်းစာမေးပွဲ အတွေ့အကြုံမှသည် အနာဂတ် နယ်စပ်မြန်မာ့ပညာရေး မြင့်မားရေးဆီသို့ (၁) ဆောင်းပါးအား နိဂုံးချုပ်လိုက်ပါသည်။
ဆောင်းပါးရှင် -- မြတ်မျိုးမြင့်မာန်
ဆက်လက်တင်ပြသွားပါမည်။
0 comments:
Post a Comment